Abaganga bamwemereye gupfa kuko igitsina bamuteyeho kitamunyuze

Umugabo w’Umubiligi wari wavutse ari umukobwa abaganga bamwemereye gupfa nyuma y’uko uyu mugabo-gore yari amaze kugaragaza ko igitsina cy’abagabo bamuteyeho mu 2009 kitamushimishije kandi bikaba byamuteraga agahinda kadashira, ngo atari kuzabasha kwihanganira iyo akomeza kubaho.

Nathan Verhelst yashizemo umwuka nk’uko yabishakaga mu bitaro byo mu mujyi wa Brussels, aho inshuti ze zari zaje kumusezeraho bwa nyuma kandi ngo yapfuye anezerewe nk’uko byatangajwe na muganga Wim Distlemans.

Umuganga Distlemans yagize ati “Verhelst yapfuye neza kuko yavuye mu buzima ari hamwe n’inshuti ze nk’uko yari yabyifuje kandi abaganga bari bamaze kwemeza ko agahinda afite kamubabaje cyane kandi katari kuzashira.”

Uyu mugabo-gore wavutse mu 1969 ngo yavutse ari umukobwa, ariko ngo iwabo baramwanga kuko bifuzaga umwana w’umuhungu. Yakuze azi neza ko iwabo batamushakaga, ndetse yiyemeza ko azakora uko ashoboye akaba umuhungu.

Mu mwaka wa 2009 ubwo yari yujuje imyaka 42 yasabye abaganga kumuhindurira igitsina, barabimukorera, ariko ntibyagenda neza bongera kumubaga inshuro eshatu kugeza ubwa nyuma mu 2012 ubwo banamuhinduriraga amabere ngo agire ateye nk’ay’abagabo.

Ibi bikorwa by’abaganga ariko ngo ntabwo byamugize umugabo neza uko yabyifuzaga kuko mbere gato y’uko yicwa akavanwamo umwuka yari yabwiye ikinyamakuru Het Laaste Nieuws ko igituza cye cyari cyarakomeje kuba nk’icy’abagore ndetse ngo n’igitsina nk’icy’abagabo bari bamuteyeho ngo nticyakoraga neza.

Nathan yagize ati “Nari namaze gutegura ibirori byo kwishimira ukuvuka kwanjye kwa kabiri, ariko nkimara kuva mu bitaro narirebye mbona ntabwo uko nsa binyuze, ndetse numva ahubwo ndiyanze kuko umubiri wanjye utari ukinejeje na buhoro.”

Mu gusobanura icyatumye asaba ko bamufasha kwipfira atababaye, yagize ati “Mu buzima bwanjye nagize ibinshimisha ariko muri rusange narababaye kuva iwacu banyangira ko ndi umukobwa, noneho n’igihe mbaye mukuru ngo nigire uko nshaka mbona ntabwo bindyoheye. Gukomeza kubaho ikindi gihe byaba ari ikosa kuko n’imyaka 44 nari maze ku isi itari ngombwa.”

Kuva mu 2002, mu gihugu cy’Ububiligi byemewe n’amategeko ko umuntu urwaye indwara idakira kandi imubabaza cyane ashobora gufashwa kwipfira aho gukomeza ababara.

Iryo tegeko rivuga ko ubishaka “agomba kuba afite uburwayi bukomeye, bumubabaza cyane kandi budakira” nk’uko Jacqueline Herremans ukuriye komisiyo yihariye ishinzwe kwiga ku byifuzo by’abasaba gupfa yabitangarije itangazamakuru.

Uyu nyakwigendera nawe ngo yari afite agahinda kamubabaza cyane kandi bigaragara ko katari kuzashira kuko guhinduka umugabo neza byari byamaze kugaragara ko bitazashoboka.

Ibyo kwemerera ababishaka kwipfira igihe badashobora kuvurwa ngo bakire byemewe mu bihugu binyuranye byateye imbere. Icyo gihe hasabwa raporo ya muganga yemeza ko ubisaba cyangwa ubisabirwa n’abo mu muryango we arwaye, ababara cyane kandi atazakira.

Kuri ubu Inteko ishinga amategeko mu Bubiligi yamaze gutangiza ibiganiro ngo ubwo burenganzira bujye buhabwa n’abana bakiri bato igihe ngo bagaragara nk’abafite ubwenge buhagije bwatuma babasha guhitamo gusaba gupfa batabitewe n’ubwana ahubwo basesenguye neza ikibibatera.

Norvege: Umusaza w’imyaka 80 yakatiwe n’urukiko azira kugura indaya

Umusaza w’imyaka 80 wo mu gihugu cya Norvege yahamijwe n’urukiko icyaha ko gushaka kugura indaya ariko bakamutesha ataragera ku ntego bityo rumukatira iminsi 15 y’igifungo n’amande y’amayero 2.400.

Mu mpera z’icyumweru gishize, urukiko rwa Oslo rwaciye urwo rubanza rutangaza ko uwo musaza yafatiwe mu cyuho muri Nyakanga 2013 ubwo yiteguraga kuryamana n’umukobwa ukora akazi k’uburaya yari yishyuye amafaranga ye ngo bakorane imibonano mu modoka.

Nyir’ugukora icyaha ngo aramutse yanze gutanga ayo mafaranga akujurira ashobora kugabanyirizwa akishyura amayero 600 kuko yari atararyamana nawe ariko bidapfa bidapfuka agomba gukora igihano cy’igifungo cy’iminsi 15; nk’uko urubuga http://www.7sur7be.fr dukesha iyi nkuru rubitangaza.

Kuva muri Mutarama 2009, mu gihugu cya Norvege hashyizweho itegeko ribuza abantu kugura indaya, ikigaragara ni uko iryo tegeko ryakangaye uburaya bwari bumaze kuba akarande none indaya zabuze abakiriya zisigaye zarigabije imihanda ya Oslo kugira ngo zibone abakiriya.

Ubushashakatsi bwakozwe bugaragaza ko 65% by’abakoreweho ubushashakatsi bashaka ko iryo tegeko rica uburaya rikurwaho mu gihe 25% barishyigikiye.

Ubushinwa : Collant ifite ubwoya, uburyo bwo kurwanya gufatwa ku ngufu

Nyuma yo kubona ko icyaha cyo gufata ku ngufu kigenda cyiyongera mu Bushinwa, ngo hashyizwe ahagaragara umwambaro ushobora gutuma kigabanuka: collant (umwenda ufata ku mubiri) ifite ubwoya.

Iyi nkuru dusanga kuri lepoint.fr ivuga ko uyu mwambaro wagaragajwe kuri Weibo (Twitter y’inshinwa), uherekejwe n’ubutumwa buvuga ngo “umwambaro mwiza wo mu gihe cy’izuba, w’ingirakamaro cyane ku bakobwa batemberana n’inshuti zabo.”

Abagaragaje uyu mwambaro batekereza ko kuba uriho ubwoya bwinshi watuma abagabo b’Abashinwa batifuza uwambaye, kuko ngo batamenyereye abakobwa bafite ubwoya bumeze gutyo ku maguru.”

Kuri ubu, nta kigaragaza ko uyu mwambaro waba ugurishwa. Ikizwi ariko ni uko iyi foto yakunzwe kandi ko abagore benshi bagaragaje ko bawushaka. Igisigaye ni ukwizera ko igihe bawambaye batahura n’abakunda ubwoya!

Uyu mwambaro uvuzweho nyuma y’uko mu Buhinde hari abanyeshuri bakoze isutiye (soutien-gorge) ibyara amashanyarazi iyo hari uwegereye igituza cy’uyambaye atabifitiye uburenganzira.